因為 hubby 放假所以 hea 住去食燒烤自助午餐(任飲任食)，好耐無食韓國燒烤，原來烤爐已進化到可以吸走埋油煙 (記得以前烤爐上面有一個類似煙囪物體，當你開始燒烤時店員會幫你拉下來貼近爐面，非常阻礙同朋友傾偈，而且吸油煙的作用不大，通常都係滿身韓國燒烤味咁走)，但今次真係令我改觀咗，我哋由 1:00 食到 3:00 走嗰時身上一 d 油煙味都無，而且環境好舒服，大部份都係卡位。
至於食物種類都算多，而且擺放得整齊企理，除咗生嘅豬、牛、羊、雞肉、多春魚、魷魚、魚塊、茄子 ..... 等等外，仲有好多熟食，豬腳薑、鹹菜豬肚、炸豆腐、豬紅、當然唔少得韓國菜必食嘅餐前小菜多款，甜品及飲品都好多選擇，今次試咗椰汁紅豆糕、大菜糕、芒果布甸、酸梅湯同玫瑰茶，味道都幾好。
另外，值得一讚店員態度好好，收碟快而且當你燒咗幾轉爐面已焦黑時，可以要求換過新嘅繼續燒，非常貼心。
是日消費: $216.00 (每位 $98+10%)
人數: 2
食後感: 食物同服務都好好，價錢合理，值得再去。
歡迎追蹤最新發報 @Facebook :【戀家‧生活宅記】Homemade Heaven
※ 如果當中有您喜歡的食譜，請給我一個 Like 吧！您的一個小鼓勵就是我繼續發報的最大動力啊！※
沒有留言:
張貼留言